Ir al contenido principal
Animalia eta landare exotiko asko aurki daitezke Euskal Herrian: batzuk,
etxeetan; besteak, naturan. Baina hau ez da haien berezko habitata.
Gainera, inbaditzaileak izan daitezke; hori dela eta, 202 espezie
debekatuta daude.
Modan daude, baina ez dira hemengoak. Ez
lukete hemen egon behar. Norbaitek ekarri ditu, ordea. Animalia
exotikoak maskota gisa izateak badu berezitik zerbait, baina baita
arriskutsutik ere. Batez ere, inbaditzaileak badira. Apirilean, mapatxe
ar heldu bat aurkitu zuten Bardean (Nafarroa); iaz, eme bat azaldu zen.
Tokiko biodibertsitaterako mehatxu argia dira mapatxeak, baina ez ziren
bakarrik iritsi: norbaitek maskotatzat zituen. Izan ere, animalia
exotikoen kumeak «politak» izaten dira: ume eta heldu askoren gutizia.
«Arazoa hazten direnean dator, hain politak ez direnean, edo zaintzea
zaila denean», azaldu du Alexander Botok, Eusko Jaurlaritzako Natura
Ingurune eta Ingurumen Plangintzako zuzendariak, jendearen ezjakintasuna
aipatuta.
Tamaina handiegia, lan karga, zaintzeko lekurik eza,
etxeko fauna eta florari egindako kalteak, asperdura... Aitzakia andana
erabiltzen ditu jendea kanimaliak aske uzteko. Mapatxeak, Floridako
dortokak, Kramer loroak, karramarro gorriak, errege pitoiak eta
eskorpioiak dira horietako zenbait. Eguberrietako edo urtebetetze opari
originalak izan daitezke. Etxea alaitzeko edo arrainontzia apaintzeko
balio dute, batzuen ustez. Baina animalia exotiko horiek inbaditzaileak
dira, eta etxean izate hutsa debekatuta dago. Hain justu, Espainiako
Gobernuak 202 espezie bildu zituen 2013an, espezie exotiko
inbaditzaileen katalogoa zehazteko dekretuan.
Internetetik etxe berrira
Salerosketa
kontrolatzea, ordea, ez da hain erraza, Jokin Larunbe Nafarroako
Gobernuko Habitatei buruzko sekzioko teknikariak adierazi duenez.
Animaliak saltzen edo hezten dituzten dendak eta instalazioak mugatzen
ari diren arren, arazo iturri nagusia beste bat da: «Zer gertatzen da
Internetekin? Oraingoz, ezin dugu kontrolatu. Pixkanaka arlo hori
zaintzeko baliabideak izatea espero dut, baina, oraingoz, jendearen
kultura da gakoa. Animalia batzuk politak izan arren, ezin dira hemen
izan».
Botok bat egin du teknikariarekin: «Jendeak ez daki
espezie horiek zer kalte egin diezaieketen hemengo espezieei eta
ekosistemari haien habitatetik atera eta aske uzten badituzte».
Mapatxea, adibidez, orojalea da; hau da, denetarik jaten du: baratzeko
produktuak, frutak, sugandilak, igelak, txoriak, arrautzak... «Kilometro
ugari egiten ditu, gainera, eta harrapatzeko oso zaila da», gehitu du
Larunbek.
Euskal Herrian oso ohikoa den beste animalia exotiko
inbaditzaile bat Floridako dortoka da; areago, planeta osoan gehien
hedatuta dauden ehun espezie inbaditzaileetako bat da. Izan ere, hemengo
dortoka baino askoz gehiago ugaltzen da. Donostiako Aiete parkean
kartel handi batek jendearen kontzientzian eragin nahi du. «Kontuan
hartu animalia guztiak, dortokak barne, bere jatorrizko bizilekuan baino
hobeto ez direla inon ere egongo».
Beste espezie batzuk negozio
iturri ere izan daitezke. Europako hainbat animalia desagertzeko
arriskuan daude, kanpotik ekarritako espezie batzuek haien bizilekua
konkistatu dutelako. Kasurik ezagunenetarikoa bisoi europarrarena da.
Larrugintzarako ekarri zuten bisoi amerikarra, baina gordeta zeuden
etxaldeetatik ihes egitea lortu, eta ingurumenean zabaldu ziren
berehala.
Horren ondorioz, europarrak Hego Euskal Herrian,
Errioxan eta Errusian soilik irauten du. «Bisoi amerikarrak hemen
hedatzea lortzen badu, gurea hilko du, eta azken ehun urteotan Europan
desagertutako lehenengo espeziea izango da», mintzo da Larunbe,
beldurrez. Halere, argi utzi du zer egin behar den halakoak saihesteko:
«Maiz eskatu dugu larrugintzako etxaldeak debekatzeko; hori da gure
xedea».
Oro har, espezie exotikoak harrapatzeko kostu ekonomikoak
handiak izan daitezkeela ohartarazi dute Botok eta Larunbek. Europako
Batasunak urtean 12.000 milioi euro behar izaten ditu espezie horiek
harrapatu eta kalteak konpontzeko. Askotarikoak izan daitezke ondorioak:
ekonomikoak, ingurumenekoak, animalia eta landareetan,
azpiegituretan... Gizakientzat ere arriskutsuak izan daitezke,
gaixotasun edo bizkarroiak kutsatu baititzakete, edo alergiak eragin.
Badaude
Euskal Herrian debekatuta ez dauden espezie exotikoak, baina Boto
horiek ekartzearen aurka azaldu da: «Animalia bat erosi baino lehen,
lehendabizi inbaditzailea den ala ez argitu behar da; dena dela, ez da
batere gomendagarria. Hobe da espezie exotikoak toki exotikoetan uztea.
Hau ez da haien etxea». Ohartarazi du zerrendan ez egonda ere hona
ekarri eta denborarekin inbaditzaile modura joka dezaketela. «Horretaz
ohartzen garenerako, beranduegi izaten da askotan», gehitu du Larunbek.
Landare inbaditzaileak
Animaliak
dira ezagunenak, baina landare ugari ere oso inbaditzaileak izan
daitezke, gizakiek jakin gabe. Euskal Herriko etxe ugaritan aurki
daiteke panpa belarra, esaterako. Urteak daramatza apaingarri gisa,
baina 2013an inbaditzaileen artean jarri zuten. Are gehiago, Bizkaiko
Foru Aldundiak kanpaina bat sortu du landare hori errotik ateratzeko.
Kostaldean eta klima epeletan zabaltzen da gehien, baina bestelako
ingurunetan ere bai. Hemengo florari tokia kendu dio. «Jendearen
laguntza behar dugu panpa belarraren arriskuaz ohartarazteko;
seguruenik, askok ez dute inbaditzailea denik jakingo», azaldu du Botok.
Uretako
hiazintoa beste adibide arrunt bat da. Ibaiko lurzoru guztia estal
dezake, eta uretara argia ailegatzea galarazi. Hori dela eta, arrainak
eta sakoneko landareak hil daitezke. «Iaz, uretako hiazintoaren haziak
aurkitu genituen Iruñeko saltoki batean. Jendeak ez daki zer erosten
duen, eta, antza denez, saltzaileek ere ez dakite zer saltzen duten»,
salatu du Larunbek, haserre.
«Jendearen heziketa landu behar
dugu». Ados daude bi adituak. Opari original bat erosi baino lehen,
badaezpada bi aldiz pentsatzeko gomendatzen dute. Larunbe: «Espezie
horiek naturaren garapenean mugitzen badira, ezin dugu ezer egin, baina,
kasu honetan, gizakiona da erantzukizuna; guregatik heldu dira hona,
eta hori da afera honen benetako arazoa».
Comentarios
Publicar un comentario
Que para que una publicación tenga legitimidad estén seguros que publicaremos los comentarios, rectificaciones, respuestas y criticas que estén escritas con respeto a las normas de cortesía habituales, aunque sean contrarios a nuestra linea de pensamiento o a alguno de nuestros colaboradores.
Por lo contrario, en caso de que se lleguen a nuestro Blogg esos comentarios ilícitos o falsedades los eliminaremos de oficio en cuanto tengamos conocimiento de los mismos, para evitar del daño que pretende causar el autor de tales comentarios.