IBARRAKO “BIRGAITZE PLANA”. ESKUALDERAKO LANPOSTUAK. BEREHALA.

“BUSTURIALDEAN LAN ETA BIZI”ekimeneko partaideak diren EHNE, ELA, LAB, GERNIKA-LUMOKO EKOLOGIA LAN TALDEA, ZAIN DEZAGUN URDAIBAI, SORTU eta ARALAR, gizarte eragile ezberdinak, herritar kide orokin zera konpartitu nahi dute:

Pabellones en el poligono Txaporta

PRENTSA OHARRA

IBARRAKO “BIRGAITZE PLANA”. ESKUALDERAKO LANPOSTUAK. BEREHALA.

Apirilaren azkenengoetan jakinarazi dute eskualdeko Alkateek, “BUSTURIALDEKO INDUSTRIALDEA, S.A.k” ez duela ezer egingo Gernika-Lumoko Ibarrako industria gunea birbizteko, egokitzeko, urbanizatzeko, ez eta “Birgaitze Planik” ere ez zuela egingo edo ordainduko, eskualdeko Alkateek eskatu bezala, orain urte bete eta erdi dela. Denbora galtzeko sasi erantzun bat eman zuten 9. hilabetean. Eta Alkateek eurek Lankidetzarako proposamen zehatzak egin ondoren, hara nolako erantzuna jaso duten hauteskundeen aurretik, hain zuzen be.

1.- Aurrekariak labur bilduta.

BUSTURIALDEKO INDUSTRIALDEA S.A.-k”, 2013.eko azaroaren 28an egin zuen Batzar Nagusian eskualdeko 10 Alkatek (Bermeo, Busturia, Murueta, Gernika-Lumo, Muxika, Ajangiz, Nabarniz, Ibarrangelu, Ea eta Elantxobekoek) zera eskatu zuten:

• "BUSTURIALDEKO INDUSTRIALDEA, S.A.”ren Batzar Nagusiaren erabakiz, Gernika-Lumoko Ibarra industrialdea "BUSTURIALDEKO INDUSTRIALDEA, S.A.”ren jarduera-eremuan sar dadila, eta, era berean, eremu horretan epe laburrean poligono urbanizatu bat abian jarri ahal izateko beharrezko diren aktuazioak burutu daitezela, kalitatezko sarbide eta hornikuntzekin, prezio eskuragarri batean lurzorua eskaini ahal izateko eta horrela bigarren sektorea indarberritzeko, eskualdearen berreskurapen orekaturako giltzarri delakoan”.

• Hau guztiak, labur, zera suposatzen du: 42 Ha.ko “Birgaitze Plana” egitea, eta bere barruan 10,6 Ha-ko lur azaleraren urbanizazioa.
• “Ibarrako Birgaitze Plan Bereziaren” erredakzioak, lehen urrats bezala, 150.000 euroko kostua dauka, gutxi gorabehera, eta 10 hilabetean eginda legoke.
• “Busturialdean Lan eta Bizi” ekimeneko giza eragileek ere Alkateen eskariarekin bat egin zuten Batzar Nagusi berean, orain 15 urteko proposamenarekin jarraituz.
• Elkartearen ohiko Batzar Nagusiak aho batez onartu zuen eskaria, eta Administratzaile Kontseilura gaia bideratu zuen.
• Eskualdeko gehiengo politikoak eta sozialak, beraz, eskari berdina egin zuten orain urtebete eta erdi dela.

2.- Herritar guztiarekin konpartitu nahi dugun hausnarketa.

Harriduraz ikusi dugu orain ia urte biko eskariari emandako erantzun paregabea. Badakigu erantzuna eman dutenak Elkarte Anonimoaren partaideak diren Eusko Jaurlaritzako SPRI enpresa publikoaren eta Bizkaiko Foru Aldundiaren ordezkariak direla. Beraz, EAJ-PNVko ordezkariak.

Eskaria aho batez onartua izateak, izan zen bezala, Industrialdeko Batzar Nagusian, esan nahi du beste Alkateek ere bideragarri ikusi zutela Ibarrako proposamena: inbertsio eragingarriagoak, merkeagoa, errealagoa, eskualdeak behar duenari erantzuten diona, auto zentratua, berehala egin ahal dena, 1.800 lanpostu baino gehiago erakartzeko gauza izan ahal dena, etekin sozial eta ekonomikoak laster antzemateko aukerak dituen proposamena, ondo kokatutako gunea, etorkizunerako kostu sozial eta energetiko gutxiagokoa, Urdaibaiko Eusko Legebiltzarreko Legea, Gidaritza Plana eta Estrategiko Planarekin bat datorrena, … Labur, “Busturialdea Industrialdea Elkarte Anonimoaren” helburuak eta eskualdeak behar duena, argi eta garbi betetzen duen proposamena.

“Busturialdean Lan eta Bizi” ekimeneko partaideok orain 15 urte direla proposatzen gabiltza hau guztia bideratzeko zaharkituta eta urbaniza barik dagoen Ibarrako lurzorua, egokitu behar dela “Birgaitze Plan Berezi” bat onartuta.

Jeltzaleek, ostera, geure eskualdeko ordezkari publikoei, hau da, gehiengo politiko bateri, kasu honetan, eta gizarte eragile gehiengo bateri, eta ondorioz, herritar orori ere, proposamena deuseztatzera ausartu dira. Kontuan hartu behar da euretariko Alkate, zinegotzi eta bozemaile arruntek ere begi onez ikusten dutela Ibarrako irtenbidea. Antza, euretariko jaun eta jabe diren baten batzuek bakarrik dakite zer egin behar den geure eskualdean eta geure diruekin.

Elkarren arteko gutxieneko errespetu bat izatea da zerbait egiteko oinarririk funtsezkoena. Eta, kontuz! hortik pasatzea oso larria litzake. Eta gu, behintzat, ez dugu nahi horrelako eskenatokirik.

Ezin digute erantzun Elkarte Anonimoaren proiektua Muxikakoa dela, horrela erabaki zutelako. Erantzunak Elkarte Anonimoaren 1. Artikuluak markatzen duen helburuetan oinarritu beharko litzake, gutxienik: hau da, eskualdeko 2. Sektorea birbizteko aukerak sustatu behar duela, eskualdea birbizten lagundu behar duela. Lehentasunak, beraz, beronek markatu behar ditu, eta ez inon oinarritzen ez den eta bertoko legeen kontra datorren antzina hartutako erabaki batean. Erabaki hori zaharkituta, garestia, baliorik gabe, kaltegarri bilakatzen ari da. Ez du eskualderako interesik.

Beraz, Eusko Jaurlaritza eta Bizkaiko Foru Aldundiak, subjektu lagungarri dira, ez erabakitzaile. Subjektu sozialak erabaki behar du. Hortaz, eskualdeko gehiengo soziala, sindikala edota, hein zabal batean, talde politikoena ere, gero eta ozenago esaten ari gara objektiboki, eta bertoko Lege eta Planetan oinarrituta, nondik nora bideratu behar den 2. sektoreko proiektua, Gernika-Lumoko Ibarrako industriguneko lurzoruetatik.

3.- Konpartitu nahi ditugun proposamenak

Hau guztia kontuan hartuta, eta “BUSTURIALDEAN LAN ETA BIZI” ekimeneko partaideok ez dugunez oraindik erantzun zuzenik jaso, baina batez ere, arrazoiak elkarren artean trukatzearen beharrizana ikusten dugunez, gaiari irteera zentzuduna emateko, eskatzen dugu “BUSTURIALDEKO INDUSTRIALDEA, S.A.ko” arduradunekin bilera bat lehenbailehen egitea.

Ikusita, era berean, Gernika-Lumoko Udalak berak aukera zuzena duela Ibarran “Birgaitze Plan Berezia” egiteko, eta bertako Alkateak eskualdeko 10 Alkateekin batera eskari berdina egin ziola “Busturialdeko Industrialdearen Elkarteari”, Gernika-Lumoko Udalbatzari eta, beraz, Alkateari iradokizun bat proposatzen diogu: denbora gehiago galdu barik, eskualdeko gehiengoan oinarrituta, eta lehenengo urrats bezala, Ibarra industrigunea egokitzeko “Birgaitze Plan Berezia” erredakziorako kontratuaren lehiaketa publikoa, berehala deitu dadila, 2006ko Lurzoru Legeak agintzen duen eran.

Busturialdean, 2015-04-14an.